Anonymous asked: هو ليه كل واحده تكتبلك او تسألك تبقى بتتكلم علي الحب ؟ فيك ايه مميز ؟
ده سؤال نفسي اسأله بس مكسوف…أنا مش شخص رومانسي، ولا فيا مواصفات فتي الأحلام، غير أني صايع و ضايع و مستقبلي مظلم و مش باينله ملامح…اسأليهم انتي و النبي ينوبك ثواب و قوليلي
Anonymous asked: التبات كلمة جاية من الاستقرار والثبات.. وانت مش بتاع الكلام ده خالص بعدين انا محبتكش اوى كده خالص.. جاتك نيلة ع الصبح :)
امتي بقي ييجي اليوم و تحبيني قوي كده..انا عن نفسي حبيتك خلاص..و جاتني نيلة ع الصبح فعلا
الجمال ده اصلة نعمة
Marilyn Monroe preparing for a costume test for the The Prince and the Showgirl, 1956.
(via audreyandmarilyn)
العين بتفضل نفس المقاس من ساعة ما بنتولد لحد ما بنموت
(via batasoda)
Anonymous asked: خلاص مبقتش اكرهك اوى.. انهاردة كنت لطيف
عقبال ما تحبيني بقي و نعيش في تبات و نبات
ايه التبات ده صحيح ؟
حد يعيش في تبات ؟
انا ماعرفش هو ايه
بس ماشكلوش حاجة يتعاش فيها
أنا باشتغل منتج
ايوه زي السبكي كده
باجيب الفنان من دول، و اخطط له المشروع و اصرف عليه لحد ما يطلع
و عموما، ناس قليلة قوي في حياتي اللي يعرفه المعلومة دي
أو بمعني اصح، مصدقين ان فيه حد ممكن يشتغل منتج اصلا
أنا مش غني ولا حاجة، ولا عمر كان معايا فلوس اكتر من الطبيعي
بس أنا باعرف اشتغل منتج…باعرف انتج
واحد مرة قاللي اني عندي موهبة الانتاج
مش فاهم يعني ايه لحد النهاردة بس ماشي
بس باحب اعمل كده..فبعمله
حتي بعد ما بقيت فقير، برده فضلت انتج حاجات
بانتج من وانا عندي ٢١ سنة..يعني بقالي ٨ سنين بانتج حاجات
مزيكا و أفلام و مطبوعات و رسومات و أي حاجة شكلها حلو
أي فكرة باحس انها مهم تبقي موجودة حوالين الناس..بانتجها
و ده يمكن اللي خلاني دايما انتج حاجات مش طبيعي ان حد ينتجها
بانتج الفكرة الحلوة، من غير حسابات و من غير ضمان انها هاتنجح
كنا بنقعد نشتغل عليها و نشوف ممكن ننفذها ازاي
و ده خلانا نطلع كفريق انتاج، مشاريع ماحدش عارف يطلع زيها لحد النهاردة
بس مكانتش بتجيب فلوس، بس انا اصلا مش عايز منها فلوس
أنا بس عايزها تبقي موجودة
و هافضل انتج حاجات جديدة و مش طبيعي ان حد تاني ينتجها
هافضل اشتغل مع ناس مش معروفة و ماعندهمش خبرة
بس عندهم افكار..حلوة..مهم انها تبقي موجودة
و هافضل اصرف عليها فلوس..عادي
و عموما يعني الانتاج مش فلوس…خالص
الانتاج مش اكتر من الواحد يخلي حاجة مش موجودة…موجودة
ده حتي كل ما خبرتي تزيد في الانتاج
كل ما بلاقي نفسي باصرف اقل
لحد ما وصلت احيانا اني مابصرفش فلوس اصلا
الانتاج مش فلوس
انا باحكي الحكاية دي من غير لزوم
بس عشان كتير باختاراقول اني عاطل
بدل ما اخش في جدل اني باشتغل منتج
و الناس تقعد تقنعني اني اشوف شغلانة بتأكل عيش
بس الحقيقة
اني باشتغل منتج
و مابعرفش اعمل حاجة تانية
Anonymous asked: طيب لما انت طيب و بترد على الكل ليه مش بترد عليا ؟ ... انا مهتمة بيك بجد و مش بتسهوك بس بجد انت ماتعرفش انت عندي ايه ! انا مش عايزة منك غير اني اتكلم معاك .. حاولت اخليك ترد بكل الطرق ماعرفتش و ماكرهتكش ! انت بالنسية لي حلم نفسي اوصله ممكن للحلم يتحقق فى يوم ؟؟ مش عارفه بس حستنى لأني مش عارفه ابطل احبك حتى لو فاقده الامل فانك مجرد تحسيسني اني موجودة و ترد
هو أنا بصراحة يعني، مش عارف ارد اقول ايه..الموضوع محرج شوية بالنسبالي و في نفس الوقت الرسائل المجهولة دي كلها شبه بعض…بالتالي عدم ردي مش مسألة شخصية خالص…غير اني ماعنديش مانع نتقابل و نبقي اصدقاء و كله يبقي زي الفل، بس موضوع اني حلم نفسك توصليله ده موضوع كبير قوي عليا…أنا ممكن ابقي ندل و زبالة و راجل ضلالي بس باحط حاجات علي البلوج بتعجبك مش اكتر…و غالبا ده اللي حصل، فاحتمال كبير لما تعرفيني تكرهيني، ولا أيه رأيك؟
و بلاش موضوع الرسائل المجهولة ده عشان بصراحة بتعصبني شوية
ابقي امضي “ش.ش” في الآخر لو مش عايزة تقولي اسمك
صباحك فُل
Anonymous asked: عشان بتخوفنى.. وزعلان كتير زيادة عن اللازم.. مش بتفرح يعنى ولا لحظة؟
مين قال اني زعلان ؟ أنا عاشق للهلس و الأي كلام..بس طبيعي الزعل بياخد وقته من الحاجات زي بقيت الحاجات و بالتالي بياخد وقته من البلوج زي بقيت الحاجات برده..بس اوعدك احاول اظهر هذا الجزء في البلوج اكتر…ابقي شوفي كده و قوليلي رأيك…و ماتخفيش، أنا طيب والله بس هما المخرجين اللي حصروني في أدوار الشر :) صباح الهلس :)
Anonymous asked: وأنا مش بحبك ومش بحب الأنتَ بتقولو
بس أنا باحب الناس اللي مابتحبش اللي أنا باقوله، أنا لو منك ماحبنيش برده…تشرفنا
